У палацы культуры і тэхнікі «Нафтавік» гледачы атрымалі асалоду ад спалучэння прэм’ерных кампазіцый, заснаваных на традыцыях святкавання Масленіцы ў розных рэгіёнах Беларусі, і нумароў з залатога фонду калектыву. Аўтар новых пастановак «Сустрэча», «Падарунак», «Ой, сівы конь бяжыць», «Святкі», «Залоўкіны пасядзелкі», «Цешчыны вячоркі», «Ластаўка», «Закаці, ясна сонейка» ‑ Ірына Грушова, мастацкі кіраўнік ансамбля «Харошкі», заслужаная артыстка Беларусі.
Сапраўдныя харэаграфічныя шэдэўры ‑ нумары Валянціны Гаявой ‑ «Гуканне вясны», «Валачобнікі», «Юр’еў конь», «Перапёлачка», «Скокі» заўсёды выклікаюць захапленне публікі, адлюстроўваюць гісторыю, творчы стыль і высокі ўзровень калектыву.
Канцерт прайшоў пад жывую музыку ў суправаджэнні вакальна-аркестровай групы ансамбля «Хорошкі». Сапраўдным яго ўпрыгожваннем сталі мілыя сэрцу лірычныя беларускія песні.
Праграма «Вясна пачынаецца з Масленкі», якая ўнікальным чынам аб’ядноўвае лепшае з мінулага і сучаснага, вельмі спадабалася публіцы. Шчырыя апладысменты гучалі ў фінале кожнага нумара.
Дзякуй вялікі, Рэчыца, за цёплы прыём! Да новых сустрэч на канцэртах ансамбля «Харошкі»!
20 сакавіка ансамбль «Харошкі» адпраўляецца ў г. Столін ствараць атмасферу свята і радаваць гледачоў.